گِندگءَ نه‌آں

لچّه‌کار: هالک ارمان

 

 

رۆچءَ نزانگا آں، شپءَ گِندگا نه‌آں

مں اَنچۆ  اێوَک آں که وتا گِندگا نه‌آں

 

وهدءِ گُباراں چمّ تَهارێنتگ‌اَنت منی

بس چارگا آں اَنچۆ، ترا گِندگا نه‌آں

 

لۆگءَ چه کمّے دور، آ بازارءِ نزّیکءَ

یک رَندے دیست وتءَ من، پدا گِندگا نه‌آں

 

هچّی نمنتگ بئیدِ منی بےکراریءَ

ڈنّءَ نچارَگا آں، تها گِندگا نه‌آں

 

تئی تْرانگاں اے پێژگهءَ یک رَندے کَندِتگ

نون آ ابێتکیءَ من اِدا گِندگا نه‌آں

 

آگاهیءَ من دیستگ تئی واب، هؤ بلے!

آگاهیءَ نون وابءِ وڑا گِندگا نه‌آں

 

کِسّه بدل کُتگ منی اَهدءِ نماسگاں

آ بَلّکءَ نوں آسءِ سرا گِندگا نه‌آں

 

ارمان نامێں مردمے گۆن اَت گۆن هر کسءَ

اے مردَکءَ نوں جِندءِ گوَرا گِندگا نه‌آں