گِندگءَ نه‌آں

لچّه‌کار: هالک ارمان

 

 

رۆچءَ نزانگا آں، شپءَ گِندگا نه‌آں

مں اَنچۆ  اێوَک آں که وتا گِندگا نه‌آں

 

وهدءِ گُباراں چمّ تَهارێنتگ‌اَنت منی

بس چارگا آں اَنچۆ، ترا گِندگا نه‌آں

 

لۆگءَ چه کمّے دور، آ بازارءِ نزّیکءَ

یک رَندے دیست وتءَ من، پدا گِندگا نه‌آں

 

هچّی نمنتگ بئیدِ منی بےکراریءَ

ڈنّءَ نچارَگا آں، تها گِندگا نه‌آں

 

تئی تْرانگاں اے پێژگهءَ یک رَندے کَندِتگ

نون آ ابێتکیءَ من اِدا گِندگا نه‌آں

 

آگاهیءَ من دیستگ تئی واب، هؤ بلے!

آگاهیءَ نون وابءِ وڑا گِندگا نه‌آں

 

کِسّه بدل کُتگ منی اَهدءِ نماسگاں

آ بَلّکءَ نوں آسءِ سرا گِندگا نه‌آں

 

ارمان نامێں مردمے گۆن اَت گۆن هر کسءَ

اے مردَکءَ نوں جِندءِ گوَرا گِندگا نه‌آں

 

 

 

 

 

 

آگاه اِنت چمّءِ واب

لچّه‌کار: پرید پِراک

 

 

آگاه اِنت چمّءِ واب ‌ءُ گار اِنت دلءِ کرار

مارا زمانگءَ پرے هالءَ کتگ بچار!

 

یک رۆچے الّمءَ مئے گلێں راز پاشک بیت

دان چینچو وهدءَ گپّءَ دلءَ داریت رازدار

 

اندێم بکن وتءَ چه تهاریءِ هاجتءَ!

گۆن ماهکانءَ نند منی کسّهءَ تؤ بیار!

 

کئی اۆستءِ پلّؤءَ تؤ وتی مِهر بستگ‌اَنت

کئی انتزارءِ کئیپءَ ترا چُش کتگ خمار

 

دنیاءَ آزمانءِ همُک دمک گۆلتگ

من انگتءَ پرید زمینّءَ وتیگءَ گار

 

 

 

 

 

دریگاں پچ کن‌اِت بێلاں

لچّه‌کار: اکبر بارکزئی

 

 

گلوءَ بستگێں بۆج‌اِت

 

دریگاں پچ کن‌اِت بێلاں

 

تهارێں کۆٹیءِ یک کُنڈےءَ کپتگ، ھلاھۆش اِت

 

په چے چۆ ژند‌ءُ ژولّ ‌ءُ مرده‌جان ‌ءُ پهکءَ دلپْروش اِت؟

 

گلوءَ بستگێں بۆج‌اِت

 

دریگاں پچ کن‌اِت بێلاں

 

 

نزان‌اِت پرچےءَ چۆش اِت؟

 

چه وت پهکءَ پرامۆش اِت

 

ھزاراں سالءِ کوَهنێں مۆکۆئی تندانی بندیگ اِت

 

وتی جندءِ ھئیال ‌ءُ پگرءِ زمزیلّانی بندیگ اِت

 

وتی وھمانی باھۆٹ ‌ءُ وتی کَستانی بندیگ اِت

 

وتی یاتانی بندیگ اِت

 

وتی جوسکانی بندیگ اِت

 

نزان‌اِت پرچےءَ چۆش اِت؟

 

گلوءَ بستگێں بۆج‌اِت

 

دریگاں پچ کن‌اِت بێلاں

 

 

اے کۆٹی زهرشانێں مار ‌ءُ زومّ ‌ءُ لولّکان پُرّ اِنت

 

اے کۆٹی بےمُرادیءِ بدێن اِلّ ‌ءُ گِشان پُرّ اِنت

 

اے کۆٹیءِ تهاری ھنجر ‌ءُ کاٹارءِ پئیما اِنت

 

بدێن نمبی گْوشئے چۆ زھرناکێ مارءِ پئیما اِنت

 

اے کۆٹی دشمن اِنت مِهرءِ

 

اے کۆٹی ساهگِر اِنت زندءِ

 

ھمُک واھشت ‌ءُ ارمان‌ءِ

 

کُشۆک اِنت آدمی‌زات‌ءِ

 

مڑاہ ‌ءُ منگهێں شانءِ

 

په چے پُرسیگ ءُ سیاه‌پۆش اِت؟

 

گلوءَ بستگێں بۆج‌اِت

 

دریگاں پچ کن‌اِت بێلاں

 

 

که ڈنّءَ رُژن تالان اِنت

 

زبادێں گْوات کشّان اِنت

 

شراب ‌ءُ کئیپ دْرنزان اِنت

 

بهار اِنت، مست ‌ءُ ساچان اِنت

 

تؤار اِنت وشّێں مُرگانی

 

کهێب اَنت دْرچک دشتانی

 

گْوشئے منگیر اَنت مستانی

 

گْوشئے ائید اِنت مُرادانی

 

من زاناں انگت سرھۆش اِت

 

گلوءَ بستگێں بۆج‌اِت

 

دریگاں پچ کن‌اِت بێلاں

 

 

 

 

دنیا

لچّه‌کار: منیر مۆمن

 

 

دنیا!

 

من تئی زێبائیءِ شیشّگےءِ تها

 

اێر کرتگ په وت

 

سبزێں هزّامےءِ ساهتے

 

یک کدۆهے

 

کدۆهءِ تها شیرکنێں کوکوے

 

یک دریگے

 

که سُهبءِ سرا

 

تئیابءِ چؤلانی پُرزێمرێں بْرمشےءَ پچ ببیت

 

سارت ‌ءُ رُژنائێں یک

 

هُردێں تهنایی‌یے

 

ارسی تْرمپءِ وڑا

 

کدِّ یک مهرگے

 

که بداریت منءَ ‌ءُ ترا ‌ءُ هُداءَ منی

 

 

سپر چۆ ساهگےءَ مهروان اِنت

لچّه‌کار: امیر دۆست

 

 

سپر چۆ ساهگےءَ مهروان اِنت

منءَ گۆن اِنت وتی پادان رؤان اِنت

 

اے چۆنێں راهگْوزی دنزے نزاناں

منی تهنائیءَ تؤکل مُشان اِنت

 

اے دمکءَ اچ من پێسر کس نئیاتکگ

اے دمکءَ مرچان هرکس سر جنان اِنت

 

شپءِ آبرێشمی تاله مرۆچاں

تئی دروازگءِ شهماں اڑان اِنت

 

تؤ انچێں چمّے ئے ، تئی زێبناکی

دلءِ آبادێں چنکاں پِر رچان اِنت

 

گْوشنت انچۆ امیرءِ شائرێں دل

مزن بوتگ بلے اُمرئےِ کسان اِنت

 

زندگی پُلّاں یله دنت مۆسمانءَ یات کنت

لچّه‌کار: میر اُمر میر

 

 

 

ارس درۆهنت دیدگانءَ، دل گمان آزات کنت

زندگی پُلّان یله دنت، مۆسمانءَ یات کنت

 

شپ وتی گاماں نداریت ، رۆچ اۆں مهتل نبیت

کؤش کئی اۆستءَ دریگاں، وشبۆاں هئیرات کنت

 

تئی وپاداری اۆن زانئے ساهتےءِ ساهگ اِنت

کئے ترارا واهگ ‌ءُ مهر‌ءِ اؤزّءَ دات کنت

 

تؤ تهاریّانی چمّاں ، الّمءَ سرومّگ کنئے

گْوات امرۆزءِ تئی کُلّ‌ءِ چراگاں شات کنت

 

تئی گَم اِنت زانئے منءَ دْراهێں گَماں دێماتِر اِنت

که منءَ چه زندگیءِ هر گمءَ آزات کنت

 

میر! تؤ وشّ ئے دلءَ دنیاءَ من هم زندگ آں

آگهی وابانی باپُشتءَ شپاں باندات کنت

 

 

 

 

 

 

ارساں رۆدێنتگ زبانے

لچّه‌کار: مجید آجز

 

 

ارساں رۆدێنتگ زبانے، دیدگاں گۆیاک پِر

سِترپئیوندێن کهێباں، بْرهنگێں پۆشاک پِر

 

مرگ‌سکراتێں ملاران، نُکّ جؤرێنتگ منی

زندْاۆبالێں شرابی شیشّگاں، تریاک پِر

 

تُنّ هێدان میچّلێنتگ، آس‌هینّارێں زرے

گژنگیءِ دامنءَ کئے زانت چینچُک چاک پِر

 

مُرگےءِ باندا چڑکّه گْواتےءِ گۆشاں کپیت

زندگی دْرچکے ‌ءُ اے دْرچکءَرا انگت تاک پِر

 

چێر ترّێنتگ همینچُک گؤرێں بچکنداں منءَ

وامے‌ءِ ڈئیساں چٹانکے پنّ پِر، مزواک پِر

 

مارا آجز تئی پلیتّێں سجدگان کاپر کتگ

نستگێں پێشانیءِ ایمّانءَ دنزے هاک پِر

 

 

 

 

 

 

جنتِررؤاجێں زندگی

لچّه‌کار: مجید آجز

 

 

امرۆز، چَهرێں جلّکے

 

جنتررؤاجێں زندگی

 

جُنزیت چۆ پیرێں بلُّکءَ

 

لٹّءِ کُمکّءَ گام جنت

 

 

...

 

 

بندیت راهاں بُکچهءَ

 

یاتءِ کپۆتی بانزلاں

 

بستگ هئیالانی سپر

 

دل نۆک‌تْردّێں آهوے

 

چه ساهگءَ جِندءِ هزیت

 

کۆه ‌ءُ اگاراں در کپیت

 

...

 

دنزانی گارێں کارؤان

 

پادءِ نشاناں اێر کنت

 

بےساهێں سِنگانی سرا

 

مهکان‌شنزێں شپ منی

 

آزمان‌بالێن مُرگےءِ

 

چُمبان چۆ دانءَ بێوَس اِنت

 

تلکے په زندءَ هر کَدَم

 

.....

 

 

لٹّءِ کمکّءَ گام جنت

 

جنتررؤاجێں زندگی

 

جُنزیت چۆ پیرێں بلّکءَ

 

جند‌ءِ گُشانءَ ماں اڑیت