گُڈّی بنیآدم
لچّهکار: مبارک کازی
سُتکگێن شهرءِ گُڈّی بنیآدم
تؤ کجام اۆستءَ زندگ ئے بارێں؟
کئی شۆهازءَ تئی چمّ راهءَ اَنت؟
راز چی اِنت تئی نندگءِ بارێں؟
لڈّتگ کُلّێں هلک ءُ بازاراں
دێم په بےنامێں منزلے رپتنت
دورسرێن راهءِ دێریگێں همراه
بےپدێن پگرانی پدا کپتنت
مهوَشێن کاڑ ءُ پُلگدێں ورنا
پُلّێں سالۆنک ءُ ٹیٹّلێں بانۆر
رپتگاَنت وهدءِ ننگرێں هارءَ
ٹیٹّل ءُ سئید ءُ آسک ءُ گڈّ ءُ گۆر
تؤ تنی وهدی نشتگ ءُ چارئے
پْرشتگێں بانءُ شنگێں بادگیراں
گیر ترا کایَنت رپتگێں نؤبت
گۆرگێں کُلّ گۆں شاگێں منگیراں
پاد آ پاد آ که انسران اِنت شپ
لاسُکێں استاران تْرپگ زرتگ
جی، زرءِ سارتێں کؤش کشّان اِنت
شپبۆءِ پُلّاں هم زَرگ زرتگ
دور چه زربارءِ دۆچێں پندۆلءَ
لُڈّان لُڈّانءَ ماهءَ سر کَشتگ
چۆ جنۆزامءِ گرێتگێں چمّاں!
زندمان سۆگی مَرگ پُرسیگ اِنت
سُرمّگێں شامءِ گرێتگێں چمّاں
سُتکگێں شهرءِ گُڈی بنیآدم
رپتگێنانی مَنتگێں مهرم
بیا منی آستونکءَ بزور پهک کن!
دیگرێں بامءِ گرێتگێں چمّاں